Asturies, única comunidá na que sigue creciendo la venta de pisos

Nin la fuerte xuba de los tipos d'interés frena l'aumentu de la compraventa de viviendes n'Asturies. El Principáu ye la única comunidá na que les operaciones siguen aumentando –el 1,5%–, anque la firma d'hipoteques empezó a baxar –el 4,9%–. 

El Conseyu Xeneral del Notariáu publicó esti día les estadístiques de febreru, mes nel que se rexistraron n'Asturies 1.100 compraventes de viviendes: 931 pisos y 179 viviendes unifamiliares. El númberu d'operaciones ye'l 1,5% superior al del mesmu mes del añu pasáu, lo que fae d'Asturies la única comunidá na que crecen les compraventes. A nivel nacional cayeron el 13,1% y en rexones como Navarra l'esbarrumbe foi del 29%.

N'Asturies siguieron creciendo les compraventes, pero la firma d'hipoteques baxó'l 4,9%, hasta un total de 431, coincidiendo coles xubíes de los tipos d'interés. Amás, la cuantía de los préstamos pa l'alquisición de vivienda ta menguando y en febreru asitió nuna media de 110.574 euros, el 0,4% menos que va un añu. 

Los precios de les viviendes adquiríes n'Asturies tamién tán baxando, según los datos que remanen los notarios. En febreru, el preciu mediu del metru cuadráu nel Principáu foi de 1.115 euros, lo que supon el 6,7% menos que'l pasáu añu. Esta baxada contrasta coles medríes que se rexistraron en diez comunidaes autónomes. Amás, nel conxuntu d'España los precios aumentaron el 0,3%.