Un afayu arqueolóxicu reescribe la historia de Santa Cristina de L.lena

L'historiador y arqueólogu Iván Muñiz quedó plasmáu delantre de la guapura y el misteriu qu'envolubren la ilesia de Santa Cristina de L.lena. "Había un enigma y los enigmes son irresistibles", almitió esti día, minutos primero de dar cuenta de los sos afayos sobre'l monumentu prerrománicu, nuna presentación entamada nel Muséu Arqueolóxicu d'Asturies a la qu'asistieron, amás d'espertos y estudiosos locales, el director xeneral de Patrimoniu Cultural del Principáu, Pablo León, y, poques gracies, la directora del Muséu, María Antonia Pedregal. 

Muñiz atopó un par de nueves pieces del rompecabeces que ye Santa Cristina: un capitel imposta y un epígrafe –una inscripción– qu'inclúi una advocación a San Clemente, dambes reutilizaes na vecina ilesia parroquial de San Lorenzo de Felgueras, na entrada de la sacristía.

L'arqueólogu llegó inesperadamente a esi afayu mientres restolaba nes fontes documentales y taba somorguiáu nel paisaxe y el paisanaxe de la redolada de la ilesia. Con él, dixo esti día, ábrese "un nuevu camín, al plantegar cuála yera l'advocación primitiva de Santa Cristina; la que tenemos güei nun apaez hasta 1610". 

Con tol material arrexuntáu, Iván Muñiz baraxa dos posibilidaes. L'historiador fai una comparanza con aquellos llibros pa neños y adolescentes con dos llectures paraleles, caúna col so propiu final. Equí, tal que él propón, tamién hai dos alternatives: o bien se construyó Santa Cristina p'agospiar la reliquia de San Clemente, que viaxó dende Bizancio hasta el Reinu d'Asturies pasando per Roma, de cuenta que, en dalgún momentu de la hestoria la ilesia perdió la so advocación inicial; o bien na so contorna había una segunda ilesia prerrománica, a la que perteneceríen les dos pieces atopaes.

Dicho d'otra miente, o esistíen "dos ilesies construyíes nel mesmu tiempu y espaciu, lo que refuerza la idea de que se trata d'un enclave d'estraordinaria importancia pal Reinu asturianu", o había "una ilesia dedicada a San Clemente que depués camudó de nome".

Iván Muñiz espera desvelar esi misteriu y afayar qué asocedió realmente nunos meses. Pel branu va viaxar a Madrid en busca d'un llibru nel qu'espera atopar la clave pa descifrar el misteriu. "Na seronda vamos tar nel siguiente capítulu, como nuna serie. Les dos opciones, les dos histories posibles, van llevanos a una ayalga, y equí nun hai final tráxicu", anunció.

La de la reliquia de San Clemente ye una trama secundaria na intriga que trescurre alredor de Santa Cristina de L.lena que da idea de la importancia y la "perspectiva internacional del reinu d'Asturies", como rescampló Iván Muñiz. L'historiador cuntó que "la tumba de San Clemente obispu atopóse nel añu 861, esa inscripción que se refier a la deposición d'una reliquia de San Clemente (la qu'alcontró en San Lorenzo de Felgueras, una ilesia muncho más moderna, d'apenes 500 años) ye prácticamente coetanea al descubrimientu de la tumba. Podemos reconstruyir el camín de la reliquia, qu'apaez en Crimea y acaba nel reinu d'Asturies, nun espaciu como L.lena, polos intercambios diplomáticos qu'esistíen", rellató. Nel Reinu d'Asturies "había munchos focos de poder y el valle de L.lena yera ún d'ellos", fae Iván Muñiz en viendo lo visto.

Va ser na seronda cuando va presentar un volume monográficu sobre los sos afayos, les sos posibles interpretaciones y conclusiones, cola collaboración del Muséu Arqueolóxicu y de la Conseyería de Cultura del Principáu, y en contactu colos responsables del Patrimoniu Cultural de la Ilesia asturiana.

Entrín y non, Iván Muñiz va siguir coles sos investigaciones, coles que diz sentise, salvando les distancies, como un modestu Indiana Jones asturianu. Nel so coche viaxa siempre con un cobertor y un par de coxinos y más d'una vegada fixo usu d'ellos, p'aprovechar les primeres hores del día pal estudiu sobre'l terrén.

Sía que non, nun cree que, a estes altures y llegáu'l casu, haya que camudar el nome de Santa Cristina de L.lena pol de San Clemente. "Yo dexaría'l nome asina, ye un nome míticu, mui guapu, preciosu", opinó.

“Cola ayuda del Gobiernu del Principáu d´Asturies”.