"Filovisión", la curiosa iniciativa d'un colexu avilesín qu'axunta filosofía ya intelixencia artificial

Intelixencia artificial y música. Esther Fano, profesora del colexu San Fernando, punxo estos ingredientes nuna coctelera y el resultáu nun pudo salir meyor. Entemeciendo dambos conceutos la profesora desarrolló un concursu, llamáu "Filovisión", nel que los sos alumnos de primeru de Bachilleratu utilizaron distintes teoríes filosófiques pa componer cantares de dellos xéneros musicales, siempre con ayuda de la intelixencia artificial (IA). "Ún d'ellos podría ser la canción del branu", bromia la docente, encantada cola gran acoyida que tuvo la idea ente los sos alumnos.

"La cosa surdió porque vía que la IA taba cada vez más de moda. Investigando, vi qu'había un programa que te dexaba facer música y pensé que podía ser daqué que se treslladara al aula", esplica Fano. Dicho y fecho. La profesora propunxo la idea a los sos alumnos que, anque nun conocíen la ferramienta, recibiéronla colos brazos abiertos. "A partir d'ehí creóse un proyectu nel qu'entemecer música y filosófica. Ellos teníen d'escoyer una teoría filosófica, la que más-yos gustara, y con ella crear un cantar pa depués facer un concursu al estilu Eurovisión", señala. L'estilu de música yera llibre y los estudiantes, "motivadísimos", punxéronse a discurrir.

L'acoyida garró por sorpresa a la mesma docente, que nun pensaba que l'acoyida diba ser tan bona. "Dende'l principiu a los alumnos interesó-yos enforma. Foi daqué increíble, a partir de la so creatividá y capacidá d'aprendizaxe fixeron cantares pertrabayaos", destaca Fano, qu'empondera que los estudiantes tuvieron que facer lletres con fundamentu per aciu de delles teoríes filosófiques, daqué que nun ye nada fácil de primeres. Amás, señala qu'esti proyectu fomenta delles competencies claves na educación, como'l trabayu n'equipu, la creatividá o l'aprendizaxe. "Quedé estelada, son rapazos mui creativos de normal, pero esto ablucólos", fae. 

Depués d'un trabayu de díes, llegó'l momentu d'esponer los sos cantares al restu de compañeros. Al puru estilu "Eurovisión", cada grupu presentó la so obra a los sos compañeros, que teníen que da-yos puntos dependiendo de lo que-yos gustara'l tema. "La ganadora podría ser perfectamente la canción del branu", asegura Fano, quien señala que los estudiantes "buscaron cantares pegadizos y trabayaron muncho los videoclips". Pa ella la clave d'esti trabayu ta en "crear competencies qu'esixan al alumnáu daqué distinto". "Yo creo que na filosofía, amás de ser una asignatura que se centra nel pensamientu, hai que facela cercana al alumnu. Si tengo qu'esplicar daqué de Aristóteles, por casu, intento llevalo a daqué qu'ellos sientan cercano. Esto ye un exemplu d'ello", comenta Fano, que se siente mui arguyosa de los sos alumnos y de tolo trabayao a lo llargo d'estes selmanes. "Si se sabe encalzar la intelixencia artificial puede usase pa daqué perbono", sentencia, de la que promete siguir desenvolviendo idees como esta p'averar la filosofía a los más mozos.

“Cola ayuda del Gobiernu del Principáu d´Asturies”.