Asina ye'l nuevu sistema d'alertes de calor pal branu que yá funciona n'Asturies: cinco zones y nuevos rangos de temperatures

El nuevu sistema d'alertes sanitaries por calor entró va unos díes en serviciu coles mires de ser más precisu na evaluación de les zones con característiques climátiques asemeyaes, en llugar de caltener la división por provincies qu'hasta agora operaba. Agora'l territoriu va estremase en 182 zones, y caúna d'elles va tener una temperatura rangu a partir de la que va entamase l'alerta.

Nel casu d'Asturies, el Principáu estremase en 5 zones. El Ministeriu de Sanidá activó un métodu que dixebra'l territoriu español en 182 zones en total, incluyendo l'ámbitu provincial. Asina, los avisos por escesos de temperatura van activase con 35 graos en Córdoba, pero con 23,9 graos en Xixón o 28,5 n'Uviéu. 

Esta nueva reformulación del Plan Nacional d'Actuaciones Preventives por Altes Temperatures, conocíu como "Plan de Calor", "ye'l preséu por aciu del que s'intenta amenorgar l'impactu del escesu de les temperatures na salú de la población, definiendo cuándo, ónde y a qué nivel se dan los avisos", tal qu'esplicó la ministra de Sanidá, Mónica García, el llunes pasáu en rueda de prensa .

Les nueves 130 subdivisiones axúntense a les 52 provincies que yá activaron el Plan de Calor el pasáu 16 de mayu. Estes zones son determinaes por AEMET con fines de predicción meteorolóxica con climatoloxíes asemeyaes de fenómenos meteorolóxicos adversos (FMA) y, ello ye, pueden ser consideraes árees de territoriu homoxénees dende un puntu de vista climatolóxicu en cuanto al comportamientu de les temperatures diaries. "La temperatura nun solmena igual nes distintes rexones d'España", aseguró Héctor Tejero, responsable de salú y cambiu climáticu nel Ministeriu de Sanidá.

Nel casu d'Asturies establécense cinco zones. Per un llau la marina occidental y la oriental asturiana, que formen dos subdivisiones, tienen temperatures rangu máximes de 23,9 graos. Na redolada de la Cordillera y los Picos d'Europa, la llende marquenla los 26 graos de máxima.

Nel Suroccidente, seríen los 28,2 graos la temperatura a partir de la que s'activaría l'alvertencia y tomaríense midíes pa evitar impactu na población por calor. Esti rangu álzase hasta los 28,5 nel centru d'Asturies y los valles mineros. 

Sicasí, caltiense la posibilidá d'establecer alertes rexonales nel casu de que se superen los rangos máximos provinciales, que n'Asturies tán marcaos polos 26,4 graos midíos nel observatoriu de referencia de l'Aemet asitiáu n'Uviéu.

Protexese

El Ministeriu de Sanidá fixo un llamamientu a la población por que s'autoprotexa frente a les altes temperatures, sobremanera en zones que tradicionalmente nun yeren caloroses pero qu'agora, col cambiu climáticu y a les puertes d'otru branu que s'espera récord: "Sí lo va ser". 

"N'España, el calor ye'l principal problema de salú venceyáu al cambiu climáticu, y nos próximos años cuentase con un aumentu de les temperatures estremes por mor del calentamientu global", alvirtió la ministra de Sanidá, Mónica García, na presentación de la campaña "Un branu de cuidáu", qu'incide na importancia de la autoprotección individual y comuñal. "Caún de nós tien que tomar midíes pa protexese del calor" y ayudar a aquellos que lo tienen más difícil a facelo", pidió.

“Cola ayuda del Gobiernu del Principáu d´Asturies”.