Asturies va recibir más de 850.000 euros del fondu de cohesión territorial

La Conferencia Sectorial pal Retu Demográficu, a la qu'asistieron el Gobiernu y los representantes de les comunidaes autónomes, aprobó por unanimidá'l repartu de 20,2 millones del fondu de cohesión territorial pa 2024, de los qu'Asturies va recibir 853.257 euros.

Los criterios pal repartu son los de densidá de población, económicos y sociales, según defende l'Executivu central. "Cola aprobación del repartu del Fondu lo que facemos ye dar continuidá al trabayu que se vieno faciendo, con un espíritu de collaboración perimportante, ente los distintos niveles de l'alministración", sorrayó la vicepresidenta tercer y ministra pa la Transición Ecolóxica y el Retu Demográficu, Teresa Ribera.

Les acciones ya iniciatives escoyíes poles comunidaes autónomes tendrán de cumplir oxetivos como los de promover midíes d'ordenación del territoriu que favorezan un nuevu modelu productivu-territorial, más integráu, equitativu ya inclusivu o enfotase nos desequilibrios territoriales no referente al accesu de la ciudadanía a los servicios públicos. Tamién van tener que promover midíes d'ordenación del territoriu cola mira d'incentivar l'actividá económica en zones en situación de mengua demográfica.

“Cola ayuda del Gobiernu del Principáu d´Asturies”.