Esti ye'l tiempu del que van disponer les cuadres en pueblos p'afayase a la normativa

Los propietarios de cortes van disponer d'hasta un añu p'afayales a la llei de Calidá Ambiental y van poder facelo emplegando la fórmula de la declaración responsable. La conseyería de Transición Ecolóxica, Industria y Desenvolvimientu Económicu publicó va unos díes la norma que va permitir el cumplimientu cola lexislación. El testu afecta a dos tipos d'instalaciones: les tradicionales (anteriores a 1961) qu'escarecen de llicencia municipal y aquelles que, magar cumplir dellos requisitos nun disponen d'autorización municipal. Les primeres van tener seis meses pa presentar la declaración responsable, mentanto que les segundes van tener doce meses, que van poder ampliase a dieciocho.

La resolución afecta a les instalaciones ganaderes de baxa incidencia medioambiental como les cuadres tradicionales, anteriores a 1961, que perduren nos núcleos rurales, construyíes de normal en piedra y que dacuando escarecen d'instalaciones auxiliares d'almacenamientu de cuchu. Estes instalaciones, que davezu s'empleguen por que'l ganáu pase los meses d'iviernu, daten del periodu previu a la entrada en vigor del Reglamentu d'actividaes molestes, insalubres, nocives y peligroses (Raminp). Anque pueden tar inscrites nel Rexistru d'Esplotaciones Ganaderes del Principáu d'Asturies (Regapa), nun tienen llicencia municipal.

Tamién a les instalaciones ganaderes en núcleos de población que, anque cumplan dellos requisitos llegales, como solicitar la llicencia d'obra, tar inscrites nel Regapa o recibir ayudes agraries, nun tienen llicencia municipal d'actividá. Estes construcciones llámense nel nuevu marcu normativu instalaciones ganaderes en precariu.

Coles mesmes, la resolución inclúi unes obligaciones téuniques ambientales, asemeyaes a les que se piden hasta agora pa llograr la llicencia municipal. Les cortes tradicionales tendrán de caltener unes mínimes condiciones d'hixene y xestión de cuchos, mentanto que les que tean en precariu tendrán de xustificar con un proyectu o memoria técnica la so capacidá d'almacenamientu d'escrementos, en fueyu o cucheru, y una superficie venceyada que dexe xestionalos.

Nel casu de les cuadres en precariu, los conceyos tendrán de definir si éstes cumplen col planiamientu urbanísticu, y en casu negativu emitir un informe de disconformidá nel que s'indique que trescurrió'l plazu pa la so llegalización urbanística. La Conseyería de Transición Ecolóxica va poder facilitar, una vegada entre wn vigor la llei, modelos non oficiales d'estos certificaos p'ayudar a los conceyos.

“Cola ayuda del Gobiernu del Principáu d´Asturies”.