La villa romana de La Estaca enfila'l séptimu branu d'escavaciones con más ayuda del Gobiernu asturianu

El yacimientu romanu de La Estaca, en Les Regueres, enfila'l so séptimu branu consecutivu d'escavaciones. Les subvenciones destinaes pola Conseyería de Cultura pa los nuevos sondeos arqueolóxicos axunten 16.400 euros, con 5.000 euros más que'l pasáu añu, y cuéntase con qu'esa cuantía aumente con otros 5.000 euros. 

L'entamu de los trabayos ta previstu "pa la segunda selmana d'agostu", asegura l'arqueólogu Juan Muñiz, director del equipu, que tien enfotu en que los proyectos nos que trabayen nun se retrasen poles condiciones meteorolóxiques. "Queda bien d'ello por afayar na villa romana de La Estaca (n'Andayón) y si se cumple colos oxetivos que tenemos pa esti branu los visitantes van poder ver trés parceles dixebraes nes qu'hai restos constructivos y arqueolóxicos de la mesma villa, que tien una gran estensión", comenta.

El plan de trabayu inclúi la escavación de "los baños asitiaos na parte oeste de la vivienda principal". Na zona que ta al pie del mosaicu atopáu en 2018 van realizase sondeos pa iguar la zona completa del "sistema d'habitaciones calefactaes" de la casa.

Tamién se pretende, esplica Juan Muñiz, "escavar la necrópolis, les tumbes", datando los restos, y "facer estudios antropolóxicos yá que tenemos a la profesora de la Universidá de Burgos Rebeca González García, que ye asturiana, y el so equipu". L'arqueólogu espera que coles xeres que se van entamar nel yacimientu a partir de la segunda selmana d'agostu "podamos empezar a facenos una idea de cómo ye la transición del mundu romanu al medieval". 

A les pintures murales atopaes nes campañes de 2019 va dedicase parte de la subvención. La decoración d'estilu pompeyanu, manifiesta Juan Muñiz, "va restaurándose a poco y a poco". 

Les escavaciones van allargase alredor d'un mes, dedicando la última selmana a "escaniar y documentar", señala l'arqueólogu. Les subvenciones, que reciben Muñiz y l'Asociación d'Amigos de la villa romana de San Martín de La Estaca, incrementáronse, tal que comprometió la conseyera de Cultura, Vanessa Gutiérrez, na visita que fexo'l branu pasáu. Con y con ello, sigue recurriéndose al micromecenazgu, como en campañes anteriores, yá que a caúna d'elles destínense alredor de 27.000 euros. 

L'equipu que va realizar les escavaciones esti branu na villa romana de La Estaca va tar compuestu por seis persones, pero a elles hai qu'axuntá-yos los topógrafos, antropólogos o restauradores, colo que'l grupu aumenta hasta los dieciocho. L'arqueólogu rescampló qu'esti podría ser l'añu nel que'l yacimientu sía declaráu Bien d'Interés Cultural (BIC). Los tramites pa otorgar el grau máximu de protección que dexa la lexislación vixente tán en marcha dende 2020.

“Cola ayuda del Gobiernu del Principáu d´Asturies”.