Eurus, del grupu nipón Toyota, va instalar n'Eilao'l so tercer parque eólicu n'Asturies

La compañía Eurus Energy, propiedá del grupu xaponés Toyota Tsusho Corporation, va llevantar n'Eilao'l so tercer parque eólicu nel occidente d'Asturies. Va convertise asina nún de los principales operadores eólicos de la rexón, xunto con EDP (seis parques), Iberdrola (otros seis) y l'austriaca Verbund (cuatro).

La Conseyería de Transición Ecolóxica acaba d'otorgar a Eurus l'autorización alministrativa de construcción del parque denomináu Eilao. Ye'l trámite cola alministración rexonal que quedaba pa entamar esti parque eólicu que va tener una potencia instalada de 15,40 megavatios (MW) y que se va allugar nel Campo de la Vaga, Pico Caliente y Pico das Cobas, n'Eilao. Tará formáu por ocho aeroxeneradores de 2 MW de potencia unitaria (trés d'ellos llindaos a 1,8 MW), un centru de tresformamientu y trés llinies soterrañes d'alta tensión pa conectar cola subestación esistente en La Vaga. 

Esti proyectu tenía preferencia pa completar la so tramitación al ser declaráu d'interés públicu superior dientro del nuevu réxime especial p'acelerar l'esplegue d'anovables nel contestu de la crisis enerxética entamada pola guerra n'Ucrania. 

Eurus yá tien dos parques eólicos n'operación n'Asturies (los de La Bobia San Isidro en Vilanova d'Ozcos y Eilao, con 58 aeroxeneradores y 49,30 MW de potencia, y el d'Alto de Abara n'El Franco y Cuaña, con trés aeroxeneradores y 6 MW) que pertenecieron a la empresa gallega Terranova Energy, integrada nel grupu nipón.

“Cola ayuda del Gobiernu del Principáu d´Asturies”.