La ría d'Avilés yá tien seis microarrecifes

El Puertu d'Avilés yá instaló seis microarrecifes biomiméticos de biorexeneración marina creaos por Ocean Ecostructures en zones del muelle de Niemeyer y caseta de Prácticos. "Agora namás queda esperar a que la vida surda nellos, controlando'l procesu a lo llargo de los próximos dos años con un siguimientu y monitorización semestral de la biodiversidá, biomasa, xeneración d'osíxenu y secuestru de CO² de les unidaes", espliquen dende'l Puertu d'Avilés. Con esti proyectu piloto búscase la potenciación y arriquecimientu de la vida marina local; esto ye, convertir la ría d'Avilés nun gran acuariu. L'oxetivu pol que se nagua ye "restaurar la vida marina y compensar l'impactu de les actividaes industriales pasaes y presentes desarrollaes en tola cuenca aguada y na redolada inmediata de la ría d'Avilés". Esti proyectu enmárcase na apuesta que dende'l Puertu ta realizándose pol cuidáu del mediu ambiente y la sostenibilidá.

L'Autoridá Portuaria yá publicó'l pliegu de prescripciones técniques, asesorada pola empresa Ocean Ecostructures. Quier entamase "un sistema pa la creación de petones artificiales pa favorecer el desenvolvimientu ya implantación de vida n'espacios degradaos como manera de recuperación y meyora de la biodiversidá", resumió va unes selmanes Rodríguez Vega del sistema instaláu nestos últimos díes.

L'impactu

Según los estudios realizaos pola empresa Ocean Ecostructures, ente les meyores ambientales que se consiguen con estos proyectos tan la xeneración de biomasa, rexeneración de la biodiversidá, meyora de la calidá de l'agua, captura de CO², xeneración d'osíxenu, y aumentu de resiliencia frente a especies invasores. Amás, tien un importante impactu social y permite'l desarrollu de programes educativos y concienciación p'atraer más visitantes y afalar el turismu sostenible.

“Cola ayuda del Gobiernu del Principáu d´Asturies”.