Jorge Daniel Castaño gana’l XVI Premiu Alfonso Iglesias de cómic con "Pelayo 99"

El diseñador y ilustrador Jorge Daniel Castaño Mariño (Montevideo, 1975) fíxose col Premiu Alfonso Iglesias de cómic n’asturianu cola so obra "Pelayo 99". El gallardón, convocáu pola Conseyería de Cultura, Política Llingüística y Deporte, celebra la so decimosesta edición reconociendo obres orixinales y inédites de cómic en llingua asturiana.

El xuráu del premiu, nel so fallu, destacó "la profesionalidá" de Jorge Daniel col cómic Pelayo 99 dende’l puntu de vista gráficu y punxo de manifiestu "l’usu correctu de la llinia y la so espresividá". Amás, la utilización del color "ta mui bien llograda y da-y al conxuntu de la obra estilu modernu, en consonancia coles tendencies del cómic actual". La historia, concluye’l xuráu, fai "un bon usu de los elementos narrativos" pa ufiertar a los llectores "una llectura dinámica y áxil".

El Premiu Alfonso Iglesias de cómic n’asturianu ta dotáu con 6.000 euros y la publicación de la obra ganadora. Nesta edición axuntó un bon númberu de propuestes con una gráfica bien destacada, profesionalidá y talentu que tuvo qu’analizar el xuráu presidíu pol director xeneral d’Acción Cultural y Normalización Llingüística, Antón García. D’él formaron parte también Xon de la Campa, ganador de la edición anterior; María Fente, llibrera especializada en cómic; Mónica García, ilustradora y bibliotecaria; Marcos Martínez, filólogu; y Ernesto García del Castillo, dibuxante.

Jorge Daniel Castaño Mariño ye diseñador y ilustrador y cursó estudios na Escuela d’Arte d’Uviéu. Na so trayectoria creativa y llaboral, bien amplia, collaboró con estudios de diseñu importantes como Gráficos y con periódicos. Al mesmu tiempu, Castaño participó en fanzines y revistes como Ojodepez, Malavida o Zander y trabayó na publicación de cómics como Quattrocento, de la editorial Dolmen, o les tires cómiques Dany El Ñoño, de Zander.

“Cola ayuda del Gobiernu del Principáu d´Asturies”.