La presión fiscal torga la competitividá d'Asturies, rescamplen los economistes

La presión fiscal ye'l factor que más inflúi na competitividá de la economía asturiana, perriba de les infraestructures y del preciu de la enerxía. Cuando menos eso opinen la mayoría de los 301 economistes que participaron nel Económetru 2024, l'indicador d'enfotu socieconómicu qu'ellabora'l Colexu Profesional d'Economistes d'Asturies en collaboración con profesoráu de la Universidá d'Uviéu y sofitu de Caxa Rural d'Asturies y Lener.

Per detrás de la presión fiscal, les infraestructures y el preciu de la enerxía –que na anterior edición del sondéu apuntárase como'l principal factor coincidiendo cola crisis inflacionaria–, asitien como principales condicionantes de la competitividá los costos salariales, el desempléu , la I+D+i, el financiamientu, el consumu, la formación y el fraude. "La presión fiscal asitia como'l principal factor qu'afeuta a la competitividá de la economía asturiana poles diferencies al respeutive d'otres rexones nos impuestos personales", esplicó Santiago Álvarez, profesor d'Economía Pública de la Universidá d'Uviéu y vocal de la Xunta de Gobiernu del Colexu d'Economistes d'Asturies.

Según reflexa l'Económetru 2024, los economistes asturianos tienen agora más enfotu na evolución favorable de la economía asturiana que n'años anteriores, pero nun lleguen al optimismu. L'índiz d'enfotu del Económetru –que s'ellabora a partir de toles respuestes al cuestionariu– asitió en -2,57 puntos nuna escala que va de -100 a 100 puntos. "Esto supon una meyora de 10,42 puntos sobre'l datu de va un añu, que yera de -12,99 puntos, y el meyor datu dende l'entamu d'esti estudiu en 2019", destacó Abel Fernández, decanu del Colexu d'Economistes d'Asturies, qu'amestó que los resultaos "dan cierta esperanza pa consiguir oxetivos de crecimientu y meyora al mediu plazu".

El clima políticu

La cayida del pesimismu nel índiz d'enfotu xeneral produzse magar que más del 88% de los encuestaos consideren que'l clima políticu afeuta negativamente a la economía asturiana. "Puede abultar una incoherencia, pero lo qu'indica ye qu'ensin esi clima l'optimismu sería mayor", esplicó'l profesor Santiago Álvarez. 

El 73,4% de los economistes afirma que la so situación económica personal ye igual o meyor que fai 12 meses (l'añu pasáu yera un 57,8%) y caltienen esi optimismu al respeutive de la situación que s'espera en 12 meses, incrementándose en 10 puntos al respeutive del añu previu (en 2024, un 76,5 % cuenta que la situación va ser igual o meyor, frente a 66,3 de 2023). 

Abel Fernández apuntó que'l pesimismu vien al respeutive de la visión de la situación económica d'Asturies, magar per primer vegada dempués de munches ediciones del Económetru la mayoría de los economistes encuestaos piensa que la situación ye igual o meyor que la de va un añu (en 2024 namás lo pensaben el 36,4%) y el 52,1% esperen que dientro de doce meses seya igual o meyor. 

La mira d'aforru nel llar pal próximu añu sigue en crecimientu al respeutive de los años previos, una y bones el 57,8% de los economistes ta acordies con que va ser posible l'aforru nel llar a lo llargo de los próximos 12 meses, y tamién hai meyores al respeutive del desempléu, col 59,1% apostando por que va siguir igual o va menguar nos próximos doce meses. 

Tocantes a la participación de les alministraciones públiques n'empreses privaes, el 49,2% d'economistes considera que namás tendríen de participar n'empreses de manera estratéxica. Y al respeutive de la necesidá de llindar el desenvolvimientu de los arriendos turísticos, la mayoría cree que probablemente faiga falta aprobar una llimitación.

“Cola ayuda del Gobiernu del Principáu d´Asturies”.