Entamáu'l campeonatu del mundu de carrera en madreñes: asina va ser y asina puedes inscribite
La competición va celebrase en Bezanes, Casu, el sábadu 3 d'agostu
El próximu 3 d'agostu la localidá casina de Bezanes, en plenu corazón del parque natural de Redes, volverá allugar el Campeonatu del Mundu de Carrera de Madreñes, que cumple yá la so cuarta edición. L'añu pasáu más de mediu centenar de persones participaron na competición. Esti añu quieren superase eses cifres, y ello ye que yá s'abrió la inscripción pa les persones que quieran participar nesta particular carrera, qu'axunta deporte con tradición.
This browser does not support the video element.
El salón de plenos del Conceyu de Casu acoyó l'actu de presentación del IV Campeonatu del Mundu de Carrera de Madreñes. Pa sofitar la prueba tuvo la directora xeneral de Deportes del Principáu, Manuela Eleazar Fernández, xunto cola presidenta de l'Asociación Cultural, Recreativa y de Festexos de Sobrecastiellu, Marta Caldevilla. Con elles, l'alcalde casín, Miguel Fernández.
Esti añu va haber cuatro categoríes, poles trés del añu anterior. Va haber una primera de neños d'hasta 7 años; una segunda, d'ente 1 a 13 años; la categoría trés, con edaes d'ente 14 y 49 años y una carrera senior, pa mayores de 50. El percorríu, amás, aumenta en 200 metros nes dos categoríes p'adultos, hasta llegar casi al mediu kilómetru (450 metros). Pa los mozos de 7 a 13 años, la carrera va tener 100 metros de llargor. Esti añu, depués de la gran asistencia de públicu de la carrera del añu pasáu, va habilitase "otru aparcamientu gratuitu", amás del yá esistente.
Les inscripciones pueden facese online nel enllaz cofebe.webnode.es y nel Instagram de la comisión de festexos.
“Cola ayuda del Gobiernu del Principáu d´Asturies”.
Temas
Más en N'asturianu
-
Carlos Marqués, autor d'un cómic sobre Rafael del Riego: "Yera un idealista y un románticu"
-
Principáu y Sadei peracaben la fórmula pa clasificar los conceyos pola so demografía
-
Entamada la Federación Asturiana de la Sidra Casero
-
Unos 160 asturianos residentes nel esterior piden acoyese al plan de torna del Gobiernu asturianu