La reserva asturiana de sangre, baxo mínimos, pel branu y la cayida de les donaciones

El mariellu, y non el verde, ye'l color qu'agora ilustra la reserva que tien el bancu de sangre d'Asturies, afectáu por una cayida importante de les donaciones na rexón. Los motivos son los avezaos na temporada braniega. "La xente marcha de vacaciones y, ello ye que nun pasa pelos sos puntos de donación habituales", esplica Ana María Ojea, directora técnica del Centru Comunitariu de Sangre y Texíos d'Asturies (CCST). 

Otra de les razones ye l'aumentu de la demanda de bolses de sangre y los sos derivaos, que faen falta pa "cubrir les urxencies procedentes d'accidentes de tráficu o tresplantes", apunta Ojea. 

Los accidentes automovilísticos aumenten davezu a lo llargo del branu, y p'atender a los que lleguen a los hospitales n'estáu críticu ye indispensable tener reserves de sangre abondo. Amás, al ascensu de la demanda braniega axúntense les necesidaes cotidianes. "Siempre fai falta sangre, los pacientes de quimioterapia, les operaciones quirúrxiques y otres patoloxíes nun sumen porque llegue'l branu", apunta la directora técnica del CCST. 

La medría de la demanda, axuntada al descensu de les donaciones, ta afarando les reserves de sangre na rexón. "Nesti primer semestre del añu, les donaciones n'Asturies menguaron alredor d'un 1,5 por cientu al respeutive de los mesmos meses del añu anterior", llamenta Ojea. Y ye que pa caltener les reserves de sangre del Principáu nun nivel suficiente "fadría falta llegar a les 800 bolses", mentanto qu'anguaño'l depósitu tien una cifra que "ronda les 500 unidaes", calcula Ana María Ojea. 

La directora técnica tienlo claro. "Una donación salva trés vides", porque con una sola estracción pueden llograse distintos componentes sanguíneos pernecesarios pa los pacientes, como glóbulos coloraos, plasma o plaquetes, ente otros. 

"El procesu de donación ye mui cenciellu y puede repitise delles vegaes al añu", esplica Ojea. Les muyeres pueden facelo hasta trés vegaes por cada 365 díes. Y los homes cuatro. Magar ye verdá que "hai que dexalo dos meses ente una donación y la siguiente", alvierte la directora técnica del CCST. 

Los pasos pa donar sangre son simples: allegar a un puntu de donación y esperar diez minutos hasta que se complete'l procesu. Los requisitos pa poder facelo son tener ente 18 y 65 años (o 70 si se tien un informe positivu del médicu de cabecera), pesar más de 50 kilos y nun carecer d'enfermedaes transmisibles per vía sanguínea. 

La frecuencia aumenta hasta los 15 díes ente donación y donación si se trata d'un procesu por donación selectiva o aféresis. "El procesu d'aféresis tien una duración de 50 minutos y puede realizase nos centros de donación d'Uviéu, Xixón o Avilés, nun ye posible facelo nos autobuses convencionales", esplica la directora técnica del CCST. 

Los grupos sanguíneos que más escosen nel Principáu son A+, 0+ y 0–, anque "fae falta sangre de tolos grupos", apunta Ojea, porque "tener salú ye un privilexu qu'en diez minutos namás puede compartise. Donar líquidu de la vida ye un actu de solidaridá y compromisu social".

“Cola ayuda del Gobiernu del Principáu d´Asturies”.