L'alza del preciu de los alimentos repicó n'Asturies en viéspores de la rebaxa del aceite

L'índiz de precios de consumu (IPC) xubió n'Asturies en xunu un 3,5% en tasa interañal, la mesma tasa qu'en mayu, mentanto que l'alza de los precios de los alimentos repicó y pasó del 4 al 4,6%%, según los datos publicaos esti día pol Institutu Nacional d'Estadística (INE). El repique de los alimentos producióse en viéspores de la supresión del IVA nel aceite d'oliva, midida aprobada pol Gobiernu qu'entró en vigor el 1 de xunetu.

La tasa interañal del IPC n'Asturies quedó en xunu nel 3,5% depués de trés meses consecutivos d'incrementos, que fueron de trés décimes en marzu, de dos n'abril y d'otres dos en mayu. En tasa mensual, los precios xubieron na comunidá un 0,6%, colo que nel acumuláu del primer semestre fixéronlo un 2,7 por cientu. 

Por grupos de precios y en tasa interañal, nel Principáu namás baxaron los precios del vistíu y el calzáu, un 0,5%, y del menaxe, un 0,3%, mentanto que los de les comunicaciones caltuviéronse invariables. Frente a ello, les principales medríes correspondieron a la vivienda, un 5,1%; los hoteles, cafés y restaurantes, un 4,9%, y los alimentos y bebíes non alcohóliques, un 4,6%. Nel últimu añu tamién xubieron los precios del ociu y la cultura, un 4,4%; les bébores alcohóliques y el tabacu, un 4,3%; la enseñanza, un 3,1%; la medicina, un 2,7%, y el tresporte, un 2,4%. 

Nel conxuntu del país, el IPC moderó en xunu al 3,4 % interañal, dos décimes menos qu'en mayu, pola baxada de los precios de los carburantes, pero tamién pola bona evolución de los alimentos, que xubieron un 4,2 % al menor ritmu dende avientu de 2021.

“Cola ayuda del Gobiernu del Principáu d´Asturies”.