Feliz ansiedá

Un arume constante a dáseles d’importante, a consumir a lo fato como midida d’altor social, escoyer les amistaes non polo bonachón sinon poles apariencies,…, trescala la ciudá de Xixón. Eses tardes-nueches na ruta del vino, sentaos nes terraces de Begoña, pasiando pela cai Corrida,… parando a falar con xente que presta que los otros te vean falar con elles, entrando nes tiendes onde l’ambientador date la diferencia coles que namái te venden vulgares productos, comer nos restauranes que te la calquen mui a gustu, ser miembru de la rede social con mayor preste, de xente de moda, de persones de más prestixu... Somos víctimes d’una drogodependencia emocional que nos machaca, que nos fae dependientes d’ella, y tolos díes necesitamos dellos xeringazos que nos mantengan n’órbita.

Esa feliz ansiedá del aparentar va esmigayándonos más y más, métenos nesi ruíu que nos enferma día a día ensin decatanos de la gravedá. Pero somos felices, asitiámonos onde queremos tar, onde siempre suañamos, nesa sociedá de consumo que nos consume pero que visti tanto. Somos enfermos crónicos d’una enfermedá llamada timu social, pero sarna con gustu nun pica.

Nun queremos tar onde la humanidá raro, esos que dediquen un tiempu a ellos mesmos, a la soledá, a estudiase per dientro, a escoyer no que gastar el tiempu ensin que naide nos lo organice. Esos bichucos probetayos que pasíen ensin cascos nes oreyes o falando pel móvil, que-yos presta oyer la mar y mírenla con dulzor. Qu’entren en llugares de poco aquello como les llibreríes y merquen llibros pa lleer, vaya perdá tiempu que dicíis vosotros.

Ansiáis hasta cuando suañáis, la cabera moda de la modernidá, d’esa modernidá porcaz que vos come l’alma y vos fiere de muerte la razón. Esta sociedá qu’agora vende hasta l’odiu, la marxinación, la discriminación, el racismo… a mui bonos precios.

Suscríbete para seguir leyendo