Ya estoy en pijama

–Que non, Merche, que me da una pereza que muerro.

–Quedasti en salir, tía, tamos esperándote.

–Yá, chica. Pero yá toi en pijama.

–Hija, Mariamor, nun puedes siguir nesi plan…

–¿Qué plan?

–Llegues a casa, pones el pijama, y nun hai con quien contar.

–Chica, yo…

–¿Qué ye, que yá non te mola venir de marcha con nosotres, ho?

–Que sí, ne, pero yá quité’l sujetador, yá punxi’l pijama…

–¡Ai, Mari, nun me sías rancia! ¡Sal, boba, vamos pasalo bomba!

–Chica, paeces un hare krishna estrenando pandereta.

–Yo anímome, tía, non como tú, que yes una seta.

–¿Yo?

-Sí, tía, esi putu pijama te chupa tola energía. Cola pandemia quedasti p’allá.

–¿P’allá? ¿Pa ónde?

–Tantu teletrabajar en pijama, ¡quedasti enganchada! ¡Yes una rancia!

–¿Y tu qué? ¿Qué pasa, que nun pases díes enteros en pijama?

–Los domingos, Mari.

–Ah. ¿Entós pa qué me critiques?

–Quitar el pijama un domingu paezme correr riesgos innecesarios. Pero, chica, entre semana…

–Mira, Merche, tengo una galbana…

–¡Sal, boba! ¡Hai un ambientazo, tán les cais llenes de paisanos!

–Nun me fales de paisanos, eh. ¡Toi farta d’ellos!

–¿Qué me dices, Mariamor?

–Los tíos xugaron tanto conmigo que yá toi disponible en play store.

–Calla, ho. Nun digas pijaes.

–¡Taquelosparió…!

–Tienes qu’animate, que tas desmotivada. ¡Sal, boba, tira ese putu pijama!

–Yá ye tarde, si me llamares antes…

–Pero si llevo llamándote tola tarde y nun me…

–Yá toi en pijama, Merche, voi meteme en Netflix a…

–¿Pero qué faes en Neflix pudiendo venir a Noreña?

–Toi farta, desanimada y en modo pijama.

–¡Ai fía! ¡Tu y el putu pijama! ¡Tendraslu gastáu, llenu de boles!

–Nun creas. Pongo unu nuevu para dir a la cama.

–¿Pa dormir, ho?

–Sí, fía, sí. Una nunca sabe a quién va atopase en suaños.

–Ai, Mari, que non te paeza mal, pero…

–¿Qué ye, ho?

–Tas más despistada qu’un vegano n’una parrillada.

–Lo que toi ye farta d’andar polos chigres aguantando xente sinsustancia.

–Yes una egoistona, Mariamor.

–¿Yo? ¿Por?

–Quedes en salir con nós y déxesnos colgaes.

–¿Sabes lo que ye quitar el sosten y tirase en plancha nel sofá?

–¡Anda, nun sías boba! ¡Venga, sal!

–Güei non, mañana.

–¿Mañana?

–Lo siento, chica, yá toi en pijama.